daur-e-nigah-e-saqi-e-mastana ek hai

daur-e-nigāh-e-sāqī-e-mastāna ek hai

paimāne do haiñ gardish-e-paimāna ek hai

piitā huuñ ghūñT ghūñT meñ sāñsoñ ke saath saath

saaqī kā aur umr kā paimāna ek hai

jis ashk meñ ho ashk-e-nadāmat vahī hai ashk

motī bahut haiñ gauhar-e-yak-dāna ek hai

kasrat kī shaan aur hai vahdat kā rañg aur

ābād hai jo ek to vīrāna ek hai

tafrīq husn-e-sham-o-gul meñ zarā nahīñ

soz-o-gudāz-e-bulbul-o-parvāna ek hai

jab sun liyā firāq kā qissa to kah diyā

majnūñ kā aur aap kā afsāna ek hai

tum ko agar hai apnī dil-ārā.iyoñ pe naaz

'kaifī' bhī apne naam kā mastāna ek hai

daur-e-nigah-e-saqi-e-mastana ek hai

paimane do hain gardish-e-paimana ek hai

pita hun ghunT ghunT mein sanson ke sath sath

saqi ka aur umr ka paimana ek hai

jis ashk mein ho ashk-e-nadamat wahi hai ashk

moti bahut hain gauhar-e-yak-dana ek hai

kasrat ki shan aur hai wahdat ka rang aur

aabaad hai jo ek to virana ek hai

tafriq husn-e-sham-o-gul mein zara nahin

soz-o-gudaz-e-bulbul-o-parwana ek hai

jab sun liya firaq ka qissa to kah diya

majnun ka aur aap ka afsana ek hai

tum ko agar hai apni dil-araiyon pe naz

'kaifi' bhi apne nam ka mastana ek hai