dayar-e-hosh ki pahle junun KHabar lena

dayār-e-hosh kī pahle junūñ ḳhabar lenā

uḌā ke dhuul na miTTī ḳharāb kar lenā

jafā bhī ho to vo tum jaano aur ham jāneñ

na ho kisī ko ḳhabar is tarah ḳhabar lenā

nishānī le ke chaleñge vatan ko ġhurbat kī

kahīñ se dasht kā dāman zarā katar lenā

niyāz-e-husn bhī hai zindagī ke dhandoñ meñ

kisī pe marne kī fursat mile to mar lenā

isī jahān se miltā hai dars-e-ibrat bhī

hazār shart hai lenā na kuchh magar lenā

na mai-kashī na ibādat hamārī aadat hai

ki sāmne koī kaam aa gayā to kar lenā

vafā ḳharāb hai raftār-e-bahr-e-hastī kī

abhī to Duub hī jā phir kabhī ubhar lenā

janāb-e-shaiḳh to bār-e-gunah se ghabrā.e

hamī uThā.eñge 'nātiq' zarā idhar lenā

dayar-e-hosh ki pahle junun KHabar lena

uDa ke dhul na miTTi KHarab kar lena

jafa bhi ho to wo tum jaano aur hum jaanen

na ho kisi ko KHabar is tarah KHabar lena

nishani le ke chalenge watan ko ghurbat ki

kahin se dasht ka daman zara katar lena

niyaz-e-husn bhi hai zindagi ke dhandon mein

kisi pe marne ki fursat mile to mar lena

isi jahan se milta hai dars-e-ibrat bhi

hazar shart hai lena na kuchh magar lena

na mai-kashi na ibaadat hamari aadat hai

ki samne koi kaam aa gaya to kar lena

wafa KHarab hai raftar-e-bahr-e-hasti ki

abhi to Dub hi ja phir kabhi ubhar lena

janab-e-shaiKH to bar-e-gunah se ghabrae

hami uThaenge 'natiq' zara idhar lena