dayar-e-sang mein rah kar bhi shishagar tha main

dayār-e-sañg meñ rah kar bhī shīshagar thā maiñ

zamāna chīḳh rahā thā ki be-ḳhabar thā maiñ

lagī thī aañkh to maryam kī god kā thā gumāñ

khulī jab aañkh to dekhā salīb par thā maiñ

amaañ kise thī mire saa.e meñ jo ruktā koī

ḳhud apnī aag meñ jaltā huā shajar thā maiñ

tamām umr na laḌne kā ġham rahā mujh ko

ajab mahāz pe haarā huā zafar thā maiñ

havā-e-vaqt ne patthar banā diyā varna

lachaktī shāḳh se TuuTā huā samar thā maiñ

tamām shahr meñ jañgal kī aag ho jaise

havā ke dosh pe uḌtī huī ḳhabar thā maiñ

dayar-e-sang mein rah kar bhi shishagar tha main

zamana chiKH raha tha ki be-KHabar tha main

lagi thi aankh to maryam ki god ka tha guman

khuli jab aankh to dekha salib par tha main

aman kise thi mere sae mein jo rukta koi

KHud apni aag mein jalta hua shajar tha main

tamam umr na laDne ka gham raha mujh ko

ajab mahaz pe haara hua zafar tha main

hawa-e-waqt ne patthar bana diya warna

lachakti shaKH se TuTa hua samar tha main

tamam shahr mein jangal ki aag ho jaise

hawa ke dosh pe uDti hui KHabar tha main