de de us ka mujhe pata koi

de de us kā mujhe pata koī

hai kahīñ par agar ḳhudā koī

dekh liije azal se tā-ba-hanūz

ham sā paidā nahīñ huā koī

sab hī jab mudda'ī ke dushman haiñ

ḳhaak samjhegā mudda'ā koī

haath jab vo chhuḌā ke jaate the

jī meñ martā thā bārhā koī

aazmā lo har ik jafā mujh par

rah na jaa.e kahīñ jafā koī

be-ḳhabar tujh ko kyā ḳhabar ki tujhe

'umr bhar DhūñDhtā rahā koī

juz tire ab kabhī na 'haidar' ko

raas aa.egā dūsrā koī

de de us ka mujhe pata koi

hai kahin par agar KHuda koi

dekh lije azal se ta-ba-hanuz

hum sa paida nahin hua koi

sab hi jab mudda'i ke dushman hain

KHak samjhega mudda'a koi

hath jab wo chhuDa ke jate the

ji mein marta tha barha koi

aazma lo har ek jafa mujh par

rah na jae kahin jafa koi

be-KHabar tujh ko kya KHabar ki tujhe

'umr bhar DhunDhta raha koi

juz tere ab kabhi na 'haidar' ko

ras aaega dusra koi