dekh aqd-e-surayya hamein angur ki sujhi

dekh aqd-e-surayyā hameñ angūr kī sūjhī

kyuuñ bāda-kashāñ ham ko bhī kyā duur kī sūjhī

ġhash khā ke girā pahle hī sho'le kī jhalak se

muusā ko bhalā kahiye to kyā tuur kī sūjhī

ham ne to use dekh ye jaanā ki parī hai

pariyoñ ne jo dekhā to unheñ huur kī sūjhī

dekhā jo nahāne meñ vo gorā badan us kā

billor kī chaukī pe jhalak nuur kī sūjhī

sar paañv se jab phañs ga.e us zulf-e-siyah meñ

jab ham ko siyāhī-e-shab-e-dījūr kī sūjhī

jannat ke liye shaiḳh jo kartā hai 'ibādat

kī ġhaur jo ḳhātir meñ to mazdūr kī sūjhī

masnūa meñ sān.e.a nazar aave to 'nazīr' aah

nazdīk kī phir kyā hai jahāñ duur kī sūjhī

dekh aqd-e-surayya hamein angur ki sujhi

kyun baada-kashan hum ko bhi kya dur ki sujhi

ghash kha ke gira pahle hi sho'le ki jhalak se

musa ko bhala kahiye to kya tur ki sujhi

hum ne to use dekh ye jaana ki pari hai

pariyon ne jo dekha to unhen hur ki sujhi

dekha jo nahane mein wo gora badan us ka

billor ki chauki pe jhalak nur ki sujhi

sar panw se jab phans gae us zulf-e-siyah mein

jab hum ko siyahi-e-shab-e-dijur ki sujhi

jannat ke liye shaiKH jo karta hai 'ibaadat

ki ghaur jo KHatir mein to mazdur ki sujhi

masnua mein sanea nazar aawe to 'nazir' aah

nazdik ki phir kya hai jahan dur ki sujhi