dekh koh-e-na-rasa ban kar bharam rakkha tera

dekh koh-e-nā-rasā ban kar bharam rakkhā tirā

maiñ ki thā ik zarra-e-be-tāb ai sahrā tirā

kaun saaqī kaisā paimāna kahāñ sahbā-e-tez

aabrū yuuñ rah ga.ī hai sar meñ thā saudā tirā

sab girebāñ sī rahe haiñ sehn-e-gul meñ baiTh kar

kaun ab sahrā ko jaa.e, hai kahāñ charchā tirā

ab anāsir meñ tavāzun DhūñDne jaa.eñ kahāñ

ham jise hamrāz samjhe pāsbāñ niklā tirā

band darvāze kiye baiThe haiñ ab ahl-e-junūñ

taḳhtiyāñ nāmoñ kī paḌh kar kyā kare rusvā tirā

daad to ahl-e-muravvat de ga.e rāhat tujhe

sher bhī un ko nazar aayā koī achchhā tirā

dekh koh-e-na-rasa ban kar bharam rakkha tera

main ki tha ek zarra-e-be-tab ai sahra tera

kaun saqi kaisa paimana kahan sahba-e-tez

aabru yun rah gai hai sar mein tha sauda tera

sab gireban si rahe hain sehn-e-gul mein baiTh kar

kaun ab sahra ko jae, hai kahan charcha tera

ab anasir mein tawazun DhunDne jaen kahan

hum jise hamraaz samjhe pasban nikla tera

band darwaze kiye baiThe hain ab ahl-e-junun

taKHtiyan namon ki paDh kar kya kare ruswa tera

dad to ahl-e-murawwat de gae rahat tujhe

sher bhi un ko nazar aaya koi achchha tera