dekh kya ban ke aa gai miTTi

dekh kyā ban ke aa ga.ī miTTī

donoñ 'ālam pe chhā ga.ī miTTī

sar jhukānā paḌā farishtoñ ko

nuur meñ jab samā ga.ī miTTī

apnī tāqat pe naaz thā jin ko

un ko kachchā chabā ga.ī miTTī

raushnī kā ġhurūr Tuut gayā

jab diyā ban ke aa ga.ī miTTī

kūza-gar sharmsār kyoñ na rahe

chaak pe muskurā ga.ī miTTī

aag paanī havā kī kyā hastī

ruuh ko bhī chhupā ga.ī miTTī

chāñd sūraj sitāre arz-o-samā

ḳhud ko kyā kyā banā ga.ī miTTī

merī miTTī kī ḳhair ho 'sāhib'

rāz-e-pinhāñ batā ga.ī miTTī

dekh kya ban ke aa gai miTTi

donon 'alam pe chha gai miTTi

sar jhukana paDa farishton ko

nur mein jab sama gai miTTi

apni taqat pe naz tha jin ko

un ko kachcha chaba gai miTTi

raushni ka ghurur Tut gaya

jab diya ban ke aa gai miTTi

kuza-gar sharmsar kyon na rahe

chaak pe muskura gai miTTi

aag pani hawa ki kya hasti

ruh ko bhi chhupa gai miTTi

chand suraj sitare arz-o-sama

KHud ko kya kya bana gai miTTi

meri miTTi ki KHair ho 'sahib'

raaz-e-pinhan bata gai miTTi