dekh le aaj teri bazm mein bhi tanha hun

dekh le aaj tirī bazm meñ bhī tanhā huuñ

maiñ jo guzre hue hangāmoñ kā ḳhamyāza huuñ

jaane kyā Thaan ke uThtā huuñ nikalne ke liye

jaane kyā soch ke darvāze se lauT aatā huuñ

mere har juzv kā hai mujh se alag ek vujūd

tum mujhe jitnā bigāḌoge maiñ ban saktā huuñ

mujh meñ raqsāñ koī aaseb hai āvāzoñ kā

maiñ kisī ujḌe hue shahr kā sannāTā huuñ

apnā hī chehra unheñ mujh meñ dikhā.ī degā

log tasvīr samajhte haiñ maiñ ā.īna huuñ

lamha-e-shauq huuñ merī koī qīmat hī nahīñ

maiñ mayassar tujhe aa jā.ūñ to mahñgā kyā huuñ

maiñ jhapaTne ke liye DhūñDh rahā huuñ mauqa'

aur vo shoḳh samajhtā hai ki sharmātā huuñ

dekh le aaj teri bazm mein bhi tanha hun

main jo guzre hue hangamon ka KHamyaza hun

jaane kya Than ke uThta hun nikalne ke liye

jaane kya soch ke darwaze se lauT aata hun

mere har juzw ka hai mujh se alag ek wujud

tum mujhe jitna bigaDoge main ban sakta hun

mujh mein raqsan koi aaseb hai aawazon ka

main kisi ujDe hue shahr ka sannaTa hun

apna hi chehra unhen mujh mein dikhai dega

log taswir samajhte hain main aaina hun

lamha-e-shauq hun meri koi qimat hi nahin

main mayassar tujhe aa jaun to mahnga kya hun

main jhapaTne ke liye DhunDh raha hun mauqa'

aur wo shoKH samajhta hai ki sharmata hun