dekh pae to kare koi pazirai bhi

dekh paa.e to kare koī pazīrā.ī bhī

maiñ tamāshā bhī huuñ aur us kā tamāshā.ī bhī

kaun samjhe mirī ābādī-o-vīrānī ko

jhiil kī sat.h pe kashtī bhī hai aur kaa.ī bhī

qafas-e-vasl meñ sab shor hamārā to nahīñ

phaḌphaḌātā hai bahut tā.ir-e-tanhā.ī bhī

ab udāsī kisī derīna nashe ke mānind

merī kamzorī bhī hai aur tavānā.ī bhī

kitnī lahreñ thiiñ jo mushtarka thiiñ ham donoñ meñ

so tire saath huī kam mirī gahrā.ī bhī

ab maiñ kānoñ pe rakhūñ haath ki āñkhoñ pe rakhūñ

shor itnā hai ki le jā.egā bīnā.ī bhī

bāñsurī kī vahī āvāz sunāte haiñ mujhe

Dhol bhī piano bhī sārañgī bhī shahnā.ī bhī

maiñ ne tohfe meñ na.e rañj kī chādar 'shāriq'

sirf laa.ī hī nahīñ ḳhud use pahnā.ī bhī

dekh pae to kare koi pazirai bhi

main tamasha bhi hun aur us ka tamashai bhi

kaun samjhe meri aabaadi-o-virani ko

jhil ki sath pe kashti bhi hai aur kai bhi

qafas-e-wasl mein sab shor hamara to nahin

phaDphaData hai bahut tair-e-tanhai bhi

ab udasi kisi derina nashe ke manind

meri kamzori bhi hai aur tawanai bhi

kitni lahren thin jo mushtarka thin hum donon mein

so tere sath hui kam meri gahrai bhi

ab main kanon pe rakhun hath ki aankhon pe rakhun

shor itna hai ki le jaega binai bhi

bansuri ki wahi aawaz sunate hain mujhe

Dhol bhi piano bhi sarangi bhi shahnai bhi

main ne tohfe mein nae ranj ki chadar 'shaariq'

sirf lai hi nahin KHud use pahnai bhi