dekh tu be-rahm aashiq nin tujhe chhoDa nahin

dekh tū be-rahm āshiq niiñ tujhe chhoḌā nahīñ

kis qadar be-rūiyāñ dekhīñ pa muñh moḌā nahīñ

ek chaspāñ hai tujhī par ḳhush-numā.ī kī qabā

dūsrā kui jāma-zeboñ meñ tirā joḌā nahīñ

laT-paTe saj niiñ tire dil kuuñ kiyā hai loT-poT

varna aalam biich Tuk bandoñ kā kuchh toḌā nahīñ

dekhnā shīrīñ kā us kuuñ saḳht laagā sañg meñ

be-sabab farhād niiñ patthar siiñ sar phoḌā nahīñ

aadmī darkār nahiñ sarkār meñ haivān DhūñDh

kaun būjhe yaañ sipāhī ke ta.iiñ ghoḌā nahīñ

jiiv ne marne meñ haq uupar tavakkul hai use

'ābrū' niiñ zaḳhm ke khāne meñ haath oḌā nahīñ

dekh tu be-rahm aashiq nin tujhe chhoDa nahin

kis qadar be-ruiyan dekhin pa munh moDa nahin

ek chaspan hai tujhi par KHush-numai ki qaba

dusra kui jama-zebon mein tera joDa nahin

laT-paTe saj nin tere dil kun kiya hai loT-poT

warna aalam bich Tuk bandon ka kuchh toDa nahin

dekhna shirin ka us kun saKHt laga sang mein

be-sabab farhad nin patthar sin sar phoDa nahin

aadmi darkar nahin sarkar mein haiwan DhunDh

kaun bujhe yan sipahi ke tain ghoDa nahin

jiw ne marne mein haq upar tawakkul hai use

'abru' nin zaKHm ke khane mein hath oDa nahin