dekha hai jis ne yar ke ruKHsar ki taraf

dekhā hai jis ne yaar ke ruḳhsār kī taraf

hargiz na jaave sair kuuñ gulzār kī taraf

ā.īna-dil kī chashm meñ nuur jamāl dost

raushan huā hai har dar-o-dīvār kī taraf

manzūr hai salāmatī-e-ḳhūñ agar tujhe

mat dekh us kī nargis-e-bīmār kī taraf

vahāñ nahīñ baġhair jauhar-e-shamshīr ḳhūñ-bahā

zāhid na jā vo zālim-e-ḳhuñḳhār kī taraf

hai dil kuuñ azm-e-chauk umīd-e-visāl par

dīvāna kā ḳhayāl hai bāzār kī taraf

kyā pūchhte ho tum ki tirā dil kidhar gayā

dil kā makāñ kahāñ? yahī dildār kī taraf

parvāna kuuñ nahīñ hai magar ḳhauf-e-jāñ 'sirāj'

nāhaq chalā hai shola-e-dīdār kī taraf

dekha hai jis ne yar ke ruKHsar ki taraf

hargiz na jawe sair kun gulzar ki taraf

aaina-dil ki chashm mein nur jamal dost

raushan hua hai har dar-o-diwar ki taraf

manzur hai salamati-e-KHun agar tujhe

mat dekh us ki nargis-e-bimar ki taraf

wahan nahin baghair jauhar-e-shamshir KHun-baha

zahid na ja wo zalim-e-KHunKHar ki taraf

hai dil kun azm-e-chauk umid-e-visal par

diwana ka KHayal hai bazar ki taraf

kya puchhte ho tum ki tera dil kidhar gaya

dil ka makan kahan? yahi dildar ki taraf

parwana kun nahin hai magar KHauf-e-jaan 'siraj'

nahaq chala hai shola-e-didar ki taraf