dekha hai kahin rang-e-sahar waqt se pahle

dekhā hai kahīñ rañg-e-sahar vaqt se pahle

shabnam na ugā dīda-e-tar vaqt se pahle

ai tā.er-e-shab rū-kash-e-gul-bāñg-e-sahar ho

ḳhushbū nahīñ detā gul-e-tar vaqt se pahle

vo husn-e-sarāpā abhī be-parda kahāñ hai

kyuuñ uTThe mohabbat kī nazar vaqt se pahle

maujoñ ke jhakole hoñ ki tūfāñ ke thapeḌe

qatra kahīñ bantā hai guhar vaqt se pahle

ai ḳhāna-bar-andāz-e-chaman thoḌā ta.ammul

miltī nahīñ shāḳh-e-gul-e-tar vaqt se pahle

takmīl-e-mohabbat ke liye chāhiye ik umr

hotā nahīñ maidān ye sar vaqt se pahle

bīnā.ī-e-nāqis kā karishma hai ye 'turfa'

aiboñ meñ nazar aayā hunar vaqt se pahle

dekha hai kahin rang-e-sahar waqt se pahle

shabnam na uga dida-e-tar waqt se pahle

ai taer-e-shab ru-kash-e-gul-bang-e-sahar ho

KHushbu nahin deta gul-e-tar waqt se pahle

wo husn-e-sarapa abhi be-parda kahan hai

kyun uTThe mohabbat ki nazar waqt se pahle

maujon ke jhakole hon ki tufan ke thapeDe

qatra kahin banta hai guhar waqt se pahle

ai KHana-bar-andaz-e-chaman thoDa tammul

milti nahin shaKH-e-gul-e-tar waqt se pahle

takmil-e-mohabbat ke liye chahiye ek umr

hota nahin maidan ye sar waqt se pahle

binai-e-naqis ka karishma hai ye 'turfa'

aibon mein nazar aaya hunar waqt se pahle