dekha jo kuchh jahan mein koi dam ye sab nahin

dekhā jo kuchh jahāñ meñ koī dam ye sab nahīñ

Tuk aañkh mūñdte hī tum aur ham ye sab nahīñ

thoḌī sī ziist hai jo ḳhushī se nibhe to ḳhair

varna nishāt-o-ḳhurramī-o-ġham ye sab nahīñ

bāġh-o-bahār-o-josh gul-o-ḳhanda-e-subūh

saut-e-hazār-o-girya-e-shabnam ye sab nahīñ

duniyā-o-dīn dīda-e-dil sabr aur qarār

tū hī agar nahīñ to ik aalam ye sab nahīñ

kis kaam ke haiñ be-asarī se agarche haiñ

āh-o-fuġhān-o-dīda-e-pur-nam ye sab nahīñ

be-ishq jitnī ḳhalq hai insāñ kī shakl meñ

nazroñ meñ ahl-e-dīd ke aadam ye sab nahīñ

zaḳhm-e-nihān-e-hijr ko be-vasl ai 'muhib'

ho sūd-mand baḳhiyā-o-marham ye sab nahīñ

dekha jo kuchh jahan mein koi dam ye sab nahin

Tuk aankh mundte hi tum aur hum ye sab nahin

thoDi si zist hai jo KHushi se nibhe to KHair

warna nishat-o-KHurrami-o-gham ye sab nahin

bagh-o-bahaar-o-josh gul-o-KHanda-e-subuh

saut-e-hazar-o-girya-e-shabnam ye sab nahin

duniya-o-din dida-e-dil sabr aur qarar

tu hi agar nahin to ek aalam ye sab nahin

kis kaam ke hain be-asari se agarche hain

aah-o-fughan-o-dida-e-pur-nam ye sab nahin

be-ishq jitni KHalq hai insan ki shakl mein

nazron mein ahl-e-did ke aadam ye sab nahin

zaKHm-e-nihan-e-hijr ko be-wasl ai 'muhib'

ho sud-mand baKHiya-o-marham ye sab nahin