dekha tujhe to aankhon ne aiwan saja liye

dekhā tujhe to āñkhoñ ne aivāñ sajā liye

jaise tamām kho.e hue ḳhvāb pā liye

jitne the tere mahke hue āñchaloñ ke rañg

sab titliyoñ ne aur dhanak ne uḌā liye

aisī ghuTī fazāoñ meñ kaise jiyeñge vo

kuchh qāfile jo aa.e haiñ taaza havā liye

in sar-phirī havāoñ se kuchh āshnā to huuñ

gahre samundaroñ meñ na kashtī ko Dāliye

iz.hār kījiye ki zarā karb kam to ho

ai dosto dukhoñ ko diloñ meñ na pāliye

ḳhud hī uThā.eñ apne junūñ kī jarāhateñ

ye rog dūsroñ ke na khāte meñ Dāliye

pahle ye kohsār to tasḳhīr kījiye

'fāriġh' abhī falak pe kamandeñ na Dāliye

dekha tujhe to aankhon ne aiwan saja liye

jaise tamam khoe hue KHwab pa liye

jitne the tere mahke hue aanchalon ke rang

sab titliyon ne aur dhanak ne uDa liye

aisi ghuTi fazaon mein kaise jiyenge wo

kuchh qafile jo aae hain taza hawa liye

in sar-phiri hawaon se kuchh aashna to hun

gahre samundaron mein na kashti ko Daliye

izhaar kijiye ki zara karb kam to ho

ai dosto dukhon ko dilon mein na paliye

KHud hi uThaen apne junun ki jarahaten

ye rog dusron ke na khate mein Daliye

pahle ye kohsar to tasKHir kijiye

'farigh' abhi falak pe kamanden na Daliye