dekha use dil-gir to dil-gir hua main

dekhā use dil-gīr to dil-gīr huā maiñ

kis dard kā rishta thā ki zanjīr huā maiñ

jis ḳhaak kā paivand hue nauhagar-e-harf

us ḳhaak kī tāsīr se iksīr huā maiñ

ai bād-o-tar-o-tāza mujhe ġhaur se paḌh le

qirtās-e-pazīrā.ī pe tahrīr huā maiñ

kis hairat-e-ā.īna ke naḳhchīr haiñ donoñ

tasvīr huā vo kabhī tasvīr huā maiñ

sau baar jo andar se maiñ TuuTā huuñ to ik baar

bāhar se nazar aayā ki ta.amīr huā maiñ

jo maiñ ne kabhī niiñd meñ dekhā hī nahīñ thā

dukh ye hai ki us ḳhvāb kī ta.abīr huā maiñ

kis hijr se guzrā huuñ ki be-sāḳhta 'mohsin'

lailā-e-tamannā se baġhal-gīr huā maiñ

dekha use dil-gir to dil-gir hua main

kis dard ka rishta tha ki zanjir hua main

jis KHak ka paiwand hue nauhagar-e-harf

us KHak ki tasir se iksir hua main

ai baad-o-tar-o-taza mujhe ghaur se paDh le

qirtas-e-pazirai pe tahrir hua main

kis hairat-e-aina ke naKHchir hain donon

taswir hua wo kabhi taswir hua main

sau bar jo andar se main TuTa hun to ek bar

bahar se nazar aaya ki tamir hua main

jo main ne kabhi nind mein dekha hi nahin tha

dukh ye hai ki us KHwab ki tabir hua main

kis hijr se guzra hun ki be-saKHta 'mohsin'

laila-e-tamanna se baghal-gir hua main