dekhe to tamaddun ka banna koi urdu mein

dekhe to tamaddun kā banñā koī urdu meñ

begāna mizājoñ kī hai dostī urdu meñ

alfāz na.e Dhāle kyā kyā na.ī urdu meñ

raa.ij mutabādil haiñ jin ke ka.ī urdu meñ

hai qaid ilāqe kī maz.hab kī na millat kī

milte haiñ dil-o-jāñ ke rishte ka.ī urdu meñ

zholīda-bayāñ vo haiñ pechīda zabāñ un kī

ik shart safā.ī kī bas rah ga.ī urdu meñ

hai tarjume ke bal par ye dām-zabāñ-dānī

ik kāvish-e-be-dānish phir phañs ga.ī urdu meñ

ab shāyad isī sūrat kuchh baat bane un kī

sochī thī jo english meñ tahrīr kī urdu meñ

ye un kī nigārish hai yā dūsroñ kī utran

ye saarī baḌī bāteñ haiñ kaun sī urdu meñ

dekhī jo mirī uchkan vo shoḳh pukār uTThā

jachne lage sarkār ab apnī na.ī urdu meñ

kyā ḳhuub hī jachtī hai in mashriqī kapḌoñ meñ

añgrezī meñ ye kyā thī kyā ho ga.ī urdu meñ

shikva na shikāyat hai pechīda bayānī kī

kyuuñ talḳh ye lahja hai kahiye bha.ī urdu meñ

dekhe to tamaddun ka banna koi urdu mein

begana mizajon ki hai dosti urdu mein

alfaz nae Dhaale kya kya nai urdu mein

raij mutabaadil hain jin ke kai urdu mein

hai qaid ilaqe ki mazhab ki na millat ki

milte hain dil-o-jaan ke rishte kai urdu mein

zholida-bayan wo hain pechida zaban un ki

ek shart safai ki bas rah gai urdu mein

hai tarjume ke bal par ye dam-zaban-dani

ek kawish-e-be-danish phir phans gai urdu mein

ab shayad isi surat kuchh baat bane un ki

sochi thi jo english mein tahrir ki urdu mein

ye un ki nigarish hai ya dusron ki utran

ye sari baDi baaten hain kaun si urdu mein

dekhi jo meri uchkan wo shoKH pukar uTTha

jachne lage sarkar ab apni nai urdu mein

kya KHub hi jachti hai in mashriqi kapDon mein

angrezi mein ye kya thi kya ho gai urdu mein

shikwa na shikayat hai pechida bayani ki

kyun talKH ye lahja hai kahiye bhai urdu mein