dekhne usko koi mere siwa kyun aae

dekhne us ko koī mere sivā kyuuñ aa.e

mere hamrāh ye naqsh-e-kaf-e-pā kyuuñ aa.e

kal thī ye fikr use haal sunā.eñ kaise

aaj ye sochte haiñ us ko sunā kyuuñ aa.e

kam nahīñ hai ye aziyyat ki abhī zinda huuñ

ab mire sar pe koī aur balā kyuuñ aa.e

maiñ bulandī pe agar jā.ūñ to kaise jā.ūñ

āsmānoñ se zamīnoñ pe ḳhudā kyuuñ aa.e

adl-o-insāf taqāzā-e-mashiyyat hī sahī

zindagī hī meñ magar roz-e-jazā kyuuñ aa.e

dauḌte ḳhuun kī ik lahar bahut kaafī hai

shafaq-e-shām ko itnī bhī hayā kyuuñ aa.e

qaidiyoñ ke liye behtar hai ki ghuT kar mar jaa.eñ

raushnī jab nahīñ aatī to havā kyuuñ aa.e

log ḳhāmoshī kā karte haiñ taqāzā ya.anī

saañs lene kī bhī 'shahzād' sadā kyuuñ aa.e

dekhne us ko koi mere siwa kyun aae

mere hamrah ye naqsh-e-kaf-e-pa kyun aae

kal thi ye fikr use haal sunaen kaise

aaj ye sochte hain us ko suna kyun aae

kam nahin hai ye aziyyat ki abhi zinda hun

ab mere sar pe koi aur bala kyun aae

main bulandi pe agar jaun to kaise jaun

aasmanon se zaminon pe KHuda kyun aae

adl-o-insaf taqaza-e-mashiyyat hi sahi

zindagi hi mein magar roz-e-jaza kyun aae

dauDte KHun ki ek lahar bahut kafi hai

shafaq-e-sham ko itni bhi haya kyun aae

qaidiyon ke liye behtar hai ki ghuT kar mar jaen

raushni jab nahin aati to hawa kyun aae

log KHamoshi ka karte hain taqaza yani

sans lene ki bhi 'shahzad' sada kyun aae