dekho insan KHak ka putla bana kya chiz hai

dekho insāñ ḳhaak kā putlā banā kyā chiiz hai

boltā hai is meñ kyā vo boltā kyā chiiz hai

rū-ba-rū us zulf ke dām-e-balā kyā chiiz hai

us nigah ke sāmne tīr-e-qazā kyā chiiz hai

yuuñ to haiñ saare butāñ ġhārat-gar-e-īmān-o-dīñ

ek vo kāfir sanam nām-e-ḳhudā kyā chiiz hai

jis ne dil merā diyā dām-e-mohabbat meñ phañsā

vo nahīñ mālūm muj ko nāsehā kyā chiiz hai

hove ik qatra jo zahrāb-e-mohabbat kā nasīb

ḳhizr phir to chashma-e-āb-e-baqā kyā chiiz hai

marg hī sehat hai us kī marg hī us kā ilaaj

ishq kā bīmār kyā jaane davā kyā chiiz hai

dil mirā baiThā hai le kar phir mujhī se vo nigār

pūchhtā hai haath meñ mere batā kyā chiiz hai

ḳhaak se paidā hue haiñ dekh rañgā-rañg gul

hai to ye nāchīz lekin is meñ kyā kyā chiiz hai

jis kī tujh ko justujū hai vo tujhī meñ hai 'zafar'

DhūñDtā phir phir ke to phir jā-ba-jā kyā chiiz hai

dekho insan KHak ka putla bana kya chiz hai

bolta hai is mein kya wo bolta kya chiz hai

ru-ba-ru us zulf ke dam-e-bala kya chiz hai

us nigah ke samne tir-e-qaza kya chiz hai

yun to hain sare butan ghaarat-gar-e-iman-o-din

ek wo kafir sanam nam-e-KHuda kya chiz hai

jis ne dil mera diya dam-e-mohabbat mein phansa

wo nahin malum muj ko naseha kya chiz hai

howe ek qatra jo zahrab-e-mohabbat ka nasib

KHizr phir to chashma-e-ab-e-baqa kya chiz hai

marg hi sehat hai us ki marg hi us ka ilaj

ishq ka bimar kya jaane dawa kya chiz hai

dil mera baiTha hai le kar phir mujhi se wo nigar

puchhta hai hath mein mere bata kya chiz hai

KHak se paida hue hain dekh ranga-rang gul

hai to ye nachiz lekin is mein kya kya chiz hai

jis ki tujh ko justuju hai wo tujhi mein hai 'zafar'

DhunDta phir phir ke to phir ja-ba-ja kya chiz hai