dekhta rahta hun aksar sham-e-qudrat dekh kar

dekhtā rahtā huuñ aksar shām-e-qudrat dekh kar

ḳhūb-sūrat dekhtā huuñ ḳhūb-sūrat dekh kar

merī niyyat dekh kar merī tabī.at dekh kar

ruk gayā rañg-e-majāz apnī haqīqat dekh kar

nāz-bardārī kī ujrat koī Thahrātā nahīñ

dene vaale de diyā karte haiñ mehnat dekh kar

naaz bhī tum ko milā andāz bhī tum ko mile

kyā buto allāh bhī detā hai sūrat dekh kar

shādmānī dekhne vaalo hameñ bhī dekh lo

ḳhush hue the ham bhī sāmān-e-masarrat dekh kar

khelne ko jaan par kaafī hai jism-e-zār bhī

tum mujhe kyā dekhte ho merī himmat dekh kar

kis kī bū pā kar chaman meñ chaar din Thahrī bahār

ram ga.ī phūloñ meñ bū kis kī shabāhat dekh kar

kuchh nahīñ achchhā to duniyā meñ burā bhī kuchh nahīñ

kījiye sab kuchh magar apnī zarūrat dekh kar

dekhta rahta hun aksar sham-e-qudrat dekh kar

KHub-surat dekhta hun KHub-surat dekh kar

meri niyyat dekh kar meri tabiat dekh kar

ruk gaya rang-e-majaz apni haqiqat dekh kar

naz-bardari ki ujrat koi Thahraata nahin

dene wale de diya karte hain mehnat dekh kar

naz bhi tum ko mila andaz bhi tum ko mile

kya buto allah bhi deta hai surat dekh kar

shadmani dekhne walo hamein bhi dekh lo

KHush hue the hum bhi saman-e-masarrat dekh kar

khelne ko jaan par kafi hai jism-e-zar bhi

tum mujhe kya dekhte ho meri himmat dekh kar

kis ki bu pa kar chaman mein chaar din Thahri bahaar

ram gai phulon mein bu kis ki shabahat dekh kar

kuchh nahin achchha to duniya mein bura bhi kuchh nahin

kijiye sab kuchh magar apni zarurat dekh kar