dekhte hi dekhte khone se pahle dekhte

dekhte hī dekhte khone se pahle dekhte

raushnī ko raushnī hone se pahle dekhte

is tarah zaa.e.a huī hotīñ na āñkheñ niiñd meñ

ham ye saare ḳhvāb agar sone se pahle dekhte

shahr kā ā.īna-ḳhāna hai sar-e-sailāb-e-aks

apnā chehra bhiiḌ meñ khone se pahle dekhte

ba.ad kā saarā safar qaabū meñ rahtā aap ke

ḳhaak ko gar be-karāñ hone se pahle dekhte

ab to jo kuchh hai sahāfat hī sahāfat hai yahāñ

jo bhī honā thā use hone se pahle dekhte

biij kis sūrat meñ bāhar aa.egā kis ko ḳhabar

fasl kyā hogī use bone se pahle dekhte

dekhte bādal se bārish tak safar taklīf kā

tum mirī āñkheñ agar rone se pahle dekhte

dekhne meñ der kar dī aap ne 'ehsās' ko

ho chukā bas vo use hone se pahle dekhte

dekhte hi dekhte khone se pahle dekhte

raushni ko raushni hone se pahle dekhte

is tarah zaea hui hotin na aankhen nind mein

hum ye sare KHwab agar sone se pahle dekhte

shahr ka aaina-KHana hai sar-e-sailab-e-aks

apna chehra bhiD mein khone se pahle dekhte

baad ka sara safar qabu mein rahta aap ke

KHak ko gar be-karan hone se pahle dekhte

ab to jo kuchh hai sahafat hi sahafat hai yahan

jo bhi hona tha use hone se pahle dekhte

bij kis surat mein bahar aaega kis ko KHabar

fasl kya hogi use bone se pahle dekhte

dekhte baadal se barish tak safar taklif ka

tum meri aankhen agar rone se pahle dekhte

dekhne mein der kar di aap ne 'ehsas' ko

ho chuka bas wo use hone se pahle dekhte