dhajjiyan jaib-o-gareban ki uDa den hum log

dhajjiyāñ jaib-o-garebāñ kī uḌā deñ ham log

aa.iye fasl-e-bahārāñ kā pata deñ ham log

jis ke saa.e meñ ta.assub kī tapish shāmil ho

vaqt kahtā hai vo dīvār girā deñ ham log

dekheñ phir kaise miTāte haiñ miTāne vaale

ek ik shāḳh nasheman se sajā deñ ham log

aur agar ho na sake kuchh bhī ujāloñ kī sabīl

ik charāġh apne lahū se hī jalā deñ ham log

un kī sahbā meñ nasha hai na nigāhoñ meñ surūr

aao mahfil meñ ye afvāh uḌā deñ ham log

yuuñ bhī kaT sakte haiñ ye tishna-labī ke lamhāt

baiTh kar bazm meñ saaqī ko duā deñ ham log

sang-e-taḳhrīb kī vus.at ko kareñ yuuñ mahdūd

ik mahal shahr meñ shīshe kā banā deñ ham log

dhajjiyan jaib-o-gareban ki uDa den hum log

aaiye fasl-e-bahaaran ka pata den hum log

jis ke sae mein tassub ki tapish shamil ho

waqt kahta hai wo diwar gira den hum log

dekhen phir kaise miTate hain miTane wale

ek ek shaKH nasheman se saja den hum log

aur agar ho na sake kuchh bhi ujalon ki sabil

ek charagh apne lahu se hi jala den hum log

un ki sahba mein nasha hai na nigahon mein surur

aao mahfil mein ye afwah uDa den hum log

yun bhi kaT sakte hain ye tishna-labi ke lamhat

baiTh kar bazm mein saqi ko dua den hum log

sang-e-taKHrib ki wusat ko karen yun mahdud

ek mahal shahr mein shishe ka bana den hum log