Dhalte hue suraj ki ziya dekh rahe hain

Dhalte hue sūraj kī ziyā dekh rahe haiñ

sadiyoñ se bhī anjām-e-vafā dekh rahe haiñ

badlī huī gulshan kī havā dekh rahe haiñ

phūloñ meñ bhī kāñToñ kī adā dekh rahe haiñ

rāhoñ meñ bhaTak jaate haiñ kis tarah musāfir

manzil pe khaḌe rāh-numā dekh rahe haiñ

tārīḳh ke chehre se na.e daur ke hāthoñ

miTtī huī tahrīr-e-vafā dekh rahe haiñ

lagtā hai ki bastī meñ koī baat huī hai

har shaḳhs ko masrūf-e-duā dekh rahe haiñ

achchhā hai baras jaa.e agar dil kī zabāñ par

ham dosh pe zulfoñ kī ghaTā dekh rahe haiñ

galiyoñ meñ madīne kī abhī dekhne vaale

sarkār ke naqsh-e-kaf-e-pā dekh rahe haiñ

ehsās ke TuuTe hue ā.īne meñ 'ḳhusrav'

jaltī huī ham apnī chitā dekh rahe haiñ

Dhalte hue suraj ki ziya dekh rahe hain

sadiyon se bhi anjam-e-wafa dekh rahe hain

badli hui gulshan ki hawa dekh rahe hain

phulon mein bhi kanTon ki ada dekh rahe hain

rahon mein bhaTak jate hain kis tarah musafir

manzil pe khaDe rah-numa dekh rahe hain

tariKH ke chehre se nae daur ke hathon

miTti hui tahrir-e-wafa dekh rahe hain

lagta hai ki basti mein koi baat hui hai

har shaKHs ko masruf-e-dua dekh rahe hain

achchha hai baras jae agar dil ki zaban par

hum dosh pe zulfon ki ghaTa dekh rahe hain

galiyon mein madine ki abhi dekhne wale

sarkar ke naqsh-e-kaf-e-pa dekh rahe hain

ehsas ke TuTe hue aaine mein 'KHusraw'

jalti hui hum apni chita dekh rahe hain