Dhang jine ka na marne ki ada mangi thi

Dhañg jiine kā na marne kī adā māñgī thī

ham ne to jurm-e-mohabbat kī sazā māñgī thī

kyā ḳhabar thī ki añdheroñ ko bhī sharmā deñge

jin ujāloñ ke liye ham ne duā māñgī thī

ishq meñ rāz-e-baqā kyā hai ḳhabar thī ham ko

ham ne kuchh soch samajh kar hī fanā māñgī thī

māñgne vāloñ meñ shāmil to the ham bhī lekin

ham ne us dar pe faqat tarz-e-navā māñgī thī

ban ga.ī husn-e-talab bhī to muamma ai 'dil'

dard māñgā thā vo samjhe ki davā māñgī thī

Dhang jine ka na marne ki ada mangi thi

hum ne to jurm-e-mohabbat ki saza mangi thi

kya KHabar thi ki andheron ko bhi sharma denge

jin ujalon ke liye hum ne dua mangi thi

ishq mein raaz-e-baqa kya hai KHabar thi hum ko

hum ne kuchh soch samajh kar hi fana mangi thi

mangne walon mein shamil to the hum bhi lekin

hum ne us dar pe faqat tarz-e-nawa mangi thi

ban gai husn-e-talab bhi to muamma ai 'dil'

dard manga tha wo samjhe ki dawa mangi thi