dhul se jab main aT jata hun

dhuul se jab maiñ aT jaatā huuñ

raah se thoḌā haT jaatā huuñ

vaqt kī dhaar hai mere sar par

roz zarā sā kaT jaatā huuñ

huuñ koī malbūs purānā

jagah jagah se phaT jaatā huuñ

jis ke liye huuñ jitnā zarūrī

vaise hī maiñ baT jaatā huuñ

haath meñ hai ye kis ke tarāzū

taul meñ roz hī ghaT jaatā huuñ

halkā sā ik abr-e-ravāñ huuñ

dhuup meñ jaldī chhaT jaatā huuñ

pattā bhī hil jaa.e kaheñ to

Dar se ḳhud maiñ simaT jaatā huuñ

bahas ġhalat hone par 'shāhīñ'

aap hī pīchhe haT jaatā huuñ

dhul se jab main aT jata hun

rah se thoDa haT jata hun

waqt ki dhaar hai mere sar par

roz zara sa kaT jata hun

hun koi malbus purana

jagah jagah se phaT jata hun

jis ke liye hun jitna zaruri

waise hi main baT jata hun

hath mein hai ye kis ke taraazu

taul mein roz hi ghaT jata hun

halka sa ek abr-e-rawan hun

dhup mein jaldi chhaT jata hun

patta bhi hil jae kahen to

Dar se KHud main simaT jata hun

bahas ghalat hone par 'shahin'

aap hi pichhe haT jata hun