dhum itni tere diwane macha sakte hain

dhuum itnī tire dīvāne machā sakte haiñ

ki abhī arsh ko chāheñ to hilā sakte haiñ

mujh se aġhyār koī aañkh milā sakte haiñ

muñh to dekho vo mire sāmne aa sakte haiñ

yaañ vo ātish-e-nafasāñ haiñ ki bhareñ aah to jhaT

aag dāmān-e-shafaq ko bhī lagā sakte haiñ

sochiye to sahī haT-dharmī na kiije sāhab

chuTkiyoñ meñ mujhe kab aap uḌā sakte haiñ

hazrat-e-dil to bigāḌ aa.e haiñ is se lekin

ab bhī ham chāheñ to phir baat banā sakte haiñ

shaiḳhī itnī na kar ai shaiḳh ki rindān-e-jahāñ

uñgliyoñ par tujhe chāheñ to nachā sakte haiñ

tū giroh-e-fuqarā ko na samajh be-jabrūt

zāt-e-maulā meñ yahī log samā sakte haiñ

dam zarā saadh ke lete haiñ pharerī to abhī

suun khīñchī huī lāhūt ko jā sakte haiñ

garche haiñ mūnis-o-ġham-ḳhvār tag-o-dau meñ sahī

par tirī tab.a ko kab raah pe lā sakte haiñ

chārasāz apne to masrūf-e-badal haiñ lekin

koī taqdīr ke likkhe ko miTā sakte haiñ

hai mohabbat jo tire dil meñ vo ik taur pe hai

ham ghaTā sakte haiñ is ko na baḌhā sakte haiñ

kar ke jhūTā na diyā jaam agar tū ne to chal

maare ġhairat ke ham afyūn to khā sakte haiñ

ham-nashīñ tū jo ye kahtā hai ki qadġhan hai bahut

ab vo āvāz bhī kab tujh ko sunā sakte haiñ

ai na āvāz sunāveñ mujhe dar tak aa kar

apne paañv ke kaḌoñ ko to bajā sakte haiñ

ham to hañste nahīñ par aap ke hañsne ke liye

aur agar saañg nahīñ koī banā sakte haiñ

kaalī kāġhaz kī abhī ek katar kar bechā

zāhid-e-bazm ke muñh par to lagā sakte haiñ

ghar se bāhar tumheñ aanā hai agar man.a to aap

apne koThe pe kabūtar to uḌā sakte haiñ

jhūlte haiñ ye jo jholī meñ so kahte haiñ mujhe

ek va.ade pe tujhe barsoñ jhulā sakte haiñ

ek Dhab ke jo qavāfī haiñ ham un meñ 'inshā'

ik ġhazal aur bhī chāheñ to sunā sakte haiñ

dhum itni tere diwane macha sakte hain

ki abhi arsh ko chahen to hila sakte hain

mujh se aghyar koi aankh mila sakte hain

munh to dekho wo mere samne aa sakte hain

yan wo aatish-e-nafasan hain ki bharen aah to jhaT

aag daman-e-shafaq ko bhi laga sakte hain

sochiye to sahi haT-dharmi na kije sahab

chuTkiyon mein mujhe kab aap uDa sakte hain

hazrat-e-dil to bigaD aae hain is se lekin

ab bhi hum chahen to phir baat bana sakte hain

shaiKHi itni na kar ai shaiKH ki rindan-e-jahan

ungliyon par tujhe chahen to nacha sakte hain

tu giroh-e-fuqara ko na samajh be-jabrut

zat-e-maula mein yahi log sama sakte hain

dam zara sadh ke lete hain phareri to abhi

sun khinchi hui lahut ko ja sakte hain

garche hain munis-o-gham-KHwar tag-o-dau mein sahi

par teri taba ko kab rah pe la sakte hain

chaarasaz apne to masruf-e-badal hain lekin

koi taqdir ke likkhe ko miTa sakte hain

hai mohabbat jo tere dil mein wo ek taur pe hai

hum ghaTa sakte hain is ko na baDha sakte hain

kar ke jhuTa na diya jam agar tu ne to chal

mare ghairat ke hum afyun to kha sakte hain

ham-nashin tu jo ye kahta hai ki qadghan hai bahut

ab wo aawaz bhi kab tujh ko suna sakte hain

ai na aawaz sunawen mujhe dar tak aa kar

apne panw ke kaDon ko to baja sakte hain

hum to hanste nahin par aap ke hansne ke liye

aur agar sang nahin koi bana sakte hain

kali kaghaz ki abhi ek katar kar becha

zahid-e-bazm ke munh par to laga sakte hain

ghar se bahar tumhein aana hai agar mana to aap

apne koThe pe kabutar to uDa sakte hain

jhulte hain ye jo jholi mein so kahte hain mujhe

ek wade pe tujhe barson jhula sakte hain

ek Dhab ke jo qawafi hain hum un mein 'insha'

ek ghazal aur bhi chahen to suna sakte hain