DhunD raha hai farang aish-e-jahan ka dawam

DhūñD rahā hai farañg aish-e-jahāñ kā davām

vā.e-tamannā-e-ḳhām vā.e-tamannā-e-ḳhām

pīr-e-haram ne kahā sun ke merī rūedād

puḳhta hai terī fuġhāñ ab na ise dil meñ thaam

thā arinī go kalīm maiñ arinī go nahīñ

us ko taqāzā ravā mujh pe taqāzā harām

garche hai ifshā-e-rāz ahl-e-nazar kī fuġhāñ

ho nahīñ saktā kabhī sheva-e-rindāna aam

halqa-e-sūfī meñ zikr be-nam o be-soz-o-sāz

maiñ bhī rahā tishna-kām tū bhī rahā tishna-kām

ishq tirī intihā ishq mirī intihā

tū bhī abhī nā-tamām maiñ bhī abhī nā-tamām

aah ki khoyā gayā tujh se faqīrī kā raaz

varna hai māl-e-faqīr saltanat-e-rūm-o-shām

DhunD raha hai farang aish-e-jahan ka dawam

wae-tamanna-e-KHam wae-tamanna-e-KHam

pir-e-haram ne kaha sun ke meri ruedad

puKHta hai teri fughan ab na ise dil mein tham

tha arini go kalim main arini go nahin

us ko taqaza rawa mujh pe taqaza haram

garche hai ifsha-e-raaz ahl-e-nazar ki fughan

ho nahin sakta kabhi shewa-e-rindana aam

halqa-e-sufi mein zikr be-nam o be-soz-o-saz

main bhi raha tishna-kaam tu bhi raha tishna-kaam

ishq teri intiha ishq meri intiha

tu bhi abhi na-tamam main bhi abhi na-tamam

aah ki khoya gaya tujh se faqiri ka raaz

warna hai mal-e-faqir saltanat-e-rum-o-sham