DhunDhta hun main kisi ko nazar aata hai koi

DhūñDhtā huuñ maiñ kisī ko nazar aatā hai koī

diid meñ kyoñ nahīñ aatā agar aatā hai koī

rāste meñ kisī saa.e kā dikhā.ī denā

bām-o-dar kā ye samajhnā ki ghar aatā hai koī

mujh pe girtī huī ye dhuup bhī ab thak ga.ī hai

maiñ bhī is taaq meñ huuñ kab shajar aatā hai koī

kyā tanāquz hai ki āñkhoñ se na ho kar dāḳhil

dil meñ paanī kī tarah ab ke dar aatā hai koī

mere haq meñ jo duā kun haiñ tere haath to sun

paḌh vazīfa bhī zarā der agar aatā hai koī

jab se is dasht meñ aayā huuñ isī soch meñ huuñ

ki bayābān meñ kyā soch kar aatā hai koī

vo merī rāh-e-junūñ meñ yuuñ numūdār huā

jyuuñ kisī tiir ke raste meñ sar aatā hai koī

DhunDhta hun main kisi ko nazar aata hai koi

did mein kyon nahin aata agar aata hai koi

raste mein kisi sae ka dikhai dena

baam-o-dar ka ye samajhna ki ghar aata hai koi

mujh pe girti hui ye dhup bhi ab thak gai hai

main bhi is taq mein hun kab shajar aata hai koi

kya tanaquz hai ki aankhon se na ho kar daKHil

dil mein pani ki tarah ab ke dar aata hai koi

mere haq mein jo dua kun hain tere hath to sun

paDh wazifa bhi zara der agar aata hai koi

jab se is dasht mein aaya hun isi soch mein hun

ki bayaban mein kya soch kar aata hai koi

wo meri rah-e-junun mein yun numudar hua

jyun kisi tir ke raste mein sar aata hai koi