DhunDhun bhala KHuda ki main rahmat kahan kahan

DhūñDhuñ bhalā ḳhudā kī maiñ rahmat kahāñ kahāñ

ab kyā batā.ūñ us kī ināyat kahāñ kahāñ

sahrā nadī pahāḌ samundar ye dasht sab

dikhlā.e sab ḳhudā kī ye vus.at kahāñ kahāñ

har samt har tarah ke dikhe us ke mo.ajize

jaise ḳhudā ne likh dī ibārat kahāñ kahāñ

sāvan meñ sabziyat se hai sairāb ye fazā

bahlā.ūñ maiñ ilāhī tabī.at kahāñ kahāñ

koī na jaan paayā ḳhudā kī ḳhudā.ī ko

ye ġham kahāñ kahāñ ye masarrat kahāñ kahāñ

andar zarā to jhāñkte apne ko bhuul kar

bāhar ḳhudā kī DhūñDhte sūrat kahāñ kahāñ

rutba hai zindagānī-o-niyyat ḳhudā se tai

insān phir bhī kartā mashaqqat kahāñ kahāñ

insāniyat atā to kī insān ko ḳhudā

phailā rahā vo dekh tū dahshat kahāñ kahāñ

kahtā naman ki ek ḳhudā hai jahān meñ

jaise bhī phir ho us kī ibādat kahāñ kahāñ

DhunDhun bhala KHuda ki main rahmat kahan kahan

ab kya bataun us ki inayat kahan kahan

sahra nadi pahaD samundar ye dasht sab

dikhlae sab KHuda ki ye wusat kahan kahan

har samt har tarah ke dikhe us ke moajize

jaise KHuda ne likh di ibarat kahan kahan

sawan mein sabziyat se hai sairab ye faza

bahlaun main ilahi tabiat kahan kahan

koi na jaan paya KHuda ki KHudai ko

ye gham kahan kahan ye masarrat kahan kahan

andar zara to jhankte apne ko bhul kar

bahar KHuda ki DhunDhte surat kahan kahan

rutba hai zindagani-o-niyyat KHuda se tai

insan phir bhi karta mashaqqat kahan kahan

insaniyat ata to ki insan ko KHuda

phaila raha wo dekh tu dahshat kahan kahan

kahta naman ki ek KHuda hai jahan mein

jaise bhi phir ho us ki ibaadat kahan kahan