DhunDte kya ho in aankhon mein kahani meri

DhūñDte kyā ho in āñkhoñ meñ kahānī merī

ḳhud meñ gum rahnā to 'ādat hai purānī merī

bhiiḌ meñ bhī tumheñ mil jā.ūñgā āsānī se

khoyā khoyā huā rahnā hai nishānī merī

maiñ ne ik baar kahā thā ki bahut pyāsā huuñ

tab se mash.hūr huī tishna-dahānī merī

yahī dīvār-o-dar-o-bām the mere hamrāz

inhī galiyoñ meñ bhaTaktī thī javānī merī

tū bhī is shahr kā baasī hai to dil se lag jā

tujh se vābasta hai ik yaad purānī merī

karbalā dasht-e-mohabbat ko banā rakkhā hai

kyā ġhazal-goī hai kyā marsiya-ḳhvānī merī

dhīme lahje kā suḳhanvar huuñ na sahbā huuñ na josh

maiñ kahāñ aur kahāñ sho'la-bayānī merī

DhunDte kya ho in aankhon mein kahani meri

KHud mein gum rahna to 'adat hai purani meri

bhiD mein bhi tumhein mil jaunga aasani se

khoya khoya hua rahna hai nishani meri

main ne ek bar kaha tha ki bahut pyasa hun

tab se mashhur hui tishna-dahani meri

yahi diwar-o-dar-o-baam the mere hamraaz

inhi galiyon mein bhaTakti thi jawani meri

tu bhi is shahr ka basi hai to dil se lag ja

tujh se wabasta hai ek yaad purani meri

karbala dasht-e-mohabbat ko bana rakkha hai

kya ghazal-goi hai kya marsiya-KHwani meri

dhime lahje ka suKHanwar hun na sahba hun na josh

main kahan aur kahan sho'la-bayani meri