dhup pichha nahin chhoDegi ye socha bhi nahin

dhuup pīchhā nahīñ chhoḌegī ye sochā bhī nahīñ

ham vahāñ haiñ jahāñ dīvār kā saaya bhī nahīñ

jaane kyuuñ dil mirā bechain rahā kartā hai

milnā to duur rahā us ko to dekhā bhī nahīñ

aap ne jab se badal Daalā hai jiine kā chalan

ab mujhe talḳhī-e-ahbāb kā shikva bhī nahīñ

mai-kada chhoḌe hue mujh ko zamāna guzrā

aur saaqī se mujhe duur kā rishta bhī nahīñ

daam meñ rakhtā parindoñ kī uḌāneñ lekin

par katarne kā magar us ko salīqa bhī nahīñ

muskurāhaT meñ koī tanz bhī ho saktā hai

ye masarrat kī alam-dār ho aisā bhī nahīñ

laakh yādoñ kī taraf lauT ke jā.ūñ 'shāhīn'

parda-e-dil par ab us shaḳhs kā chehra bhī nahīñ

dhup pichha nahin chhoDegi ye socha bhi nahin

hum wahan hain jahan diwar ka saya bhi nahin

jaane kyun dil mera bechain raha karta hai

milna to dur raha us ko to dekha bhi nahin

aap ne jab se badal Dala hai jine ka chalan

ab mujhe talKHi-e-ahbab ka shikwa bhi nahin

mai-kada chhoDe hue mujh ko zamana guzra

aur saqi se mujhe dur ka rishta bhi nahin

dam mein rakhta parindon ki uDanen lekin

par katarne ka magar us ko saliqa bhi nahin

muskurahaT mein koi tanz bhi ho sakta hai

ye masarrat ki alam-dar ho aisa bhi nahin

lakh yaadon ki taraf lauT ke jaun 'shahin'

parda-e-dil par ab us shaKHs ka chehra bhi nahin