did ki ek aan mein kar-e-dawam ho gaya

diid kī ek aan meñ kār-e-davām ho gayā

vo bhī tamām ho gayā maiñ bhī tamām ho gayā

ab maiñ huuñ ik azaab meñ aur ajab azaab meñ

jannat-e-pur-sukūt meñ mujh se kalām ho gayā

aah vo aish-e-rāz-e-jāñ haa.e vo aish-e-rāz-e-jāñ

haa.e vo aish-e-rāz-e-jāñ shahr meñ aam ho gayā

rishta-e-rañg-e-jāñ mirā nik.hat-e-nāz se tirī

puḳhta huā aur is qadar ya.anī ki ḳhaam ho gayā

pūchh na vasl kā hisāb haal hai ab bahut ḳharāb

rishta-e-jism-o-jāñ ke biich jism harām ho gayā

shahr kī dāstāñ na pūchh hai ye ajiib dāstāñ

aane se shahryār ke shahr ġhulām ho gayā

dil kī kahāniyāñ banīñ kūcha-ba-kūcha kū-ba-kū

sah ke malāl-e-shahr ko shahr meñ naam ho gayā

'jaun' kī tishnagī kā thā ḳhuub hī mājrā ki jo

mīnā-ba-mīnā mai-ba-mai jām-ba-jām ho gayā

nāf-piyāle ko tire dekh liyā muġhāñ ne jaan

saare hī mai-kade kā aaj kaam tamām ho gayā

us kī nigāh uTh ga.ī aur meñ uTh ke rah gayā

merī nigāh jhuk ga.ī aur salām ho gayā

did ki ek aan mein kar-e-dawam ho gaya

wo bhi tamam ho gaya main bhi tamam ho gaya

ab main hun ek azab mein aur ajab azab mein

jannat-e-pur-sukut mein mujh se kalam ho gaya

aah wo aish-e-raaz-e-jaan hae wo aish-e-raaz-e-jaan

hae wo aish-e-raaz-e-jaan shahr mein aam ho gaya

rishta-e-rang-e-jaan mera nikhat-e-naz se teri

puKHta hua aur is qadar yani ki KHam ho gaya

puchh na wasl ka hisab haal hai ab bahut KHarab

rishta-e-jism-o-jaan ke bich jism haram ho gaya

shahr ki dastan na puchh hai ye ajib dastan

aane se shahryar ke shahr ghulam ho gaya

dil ki kahaniyan banin kucha-ba-kucha ku-ba-ku

sah ke malal-e-shahr ko shahr mein nam ho gaya

'jaun' ki tishnagi ka tha KHub hi majra ki jo

mina-ba-mina mai-ba-mai jam-ba-jam ho gaya

naf-piyale ko tere dekh liya mughan ne jaan

sare hi mai-kade ka aaj kaam tamam ho gaya

us ki nigah uTh gai aur mein uTh ke rah gaya

meri nigah jhuk gai aur salam ho gaya