dida-e-hairan ne tamasha kiya

dīda-e-hairāñ ne tamāshā kiyā

der talak vo mujhe dekhā kiyā

zabt-e-fuġhāñ go ki asar thā kiyā

hausla kyā kyā na kiyā kyā kiyā

aañkh na lagne se shab ahbāb ne

aañkh ke lag jaane kā charchā kiyā

mar ga.e us ke lab-e-jāñ-baḳhsh par

ham ne ilaaj aap hī apnā kiyā

bujh ga.ī ik aah meñ sham-e-hayāt

mujh ko dam-e-sard ne ThanDā kiyā

ġhair ayādat se burā mānte

qatl kiyā aan ke achchhā kiyā

un se parī-vash ko na dekhe koī

mujh ko mirī sharm ne rusvā kiyā

zindagī-e-hijr bhī ik maut thī

marg ne kyā kār-e-masīhā kiyā

paan meñ ye rañg kahāñ aap ne

aap mire ḳhuun kā da.avā kiyā

jaur kā shikva na karūñ zulm hai

raaz mirā sabr ne ifshā kiyā

kuchh bhī ban aatī nahīñ kyā kījiye

us ke bigaḌne ne kuchh aisā kiyā

jaa.e thī terī mire dil meñ so hai

ġhair se kyuuñ shikva-e-bejā kiyā

rahm falak aur mire haal par

tū ne karam ai sitam-ārā kiyā

sach hī sahī aap kā paimāñ vale

marg ne kab vāda-e-fardā kiyā

da.ava-e-taklīf se jallād ne

roz-e-jazā qatl phir apnā kiyā

marg ne hijrāñ meñ chhupāyā hai muñh

lo muñh usī parda-nashīñ kā kiyā

dushman-e-'momin' hī rahe but sadā

mujh se mire naam ne ye kyā kiyā

dida-e-hairan ne tamasha kiya

der talak wo mujhe dekha kiya

zabt-e-fughan go ki asar tha kiya

hausla kya kya na kiya kya kiya

aankh na lagne se shab ahbab ne

aankh ke lag jaane ka charcha kiya

mar gae us ke lab-e-jaan-baKHsh par

hum ne ilaj aap hi apna kiya

bujh gai ek aah mein sham-e-hayat

mujh ko dam-e-sard ne ThanDa kiya

ghair ayaadat se bura mante

qatl kiya aan ke achchha kiya

un se pari-wash ko na dekhe koi

mujh ko meri sharm ne ruswa kiya

zindagi-e-hijr bhi ek maut thi

marg ne kya kar-e-masiha kiya

pan mein ye rang kahan aap ne

aap mere KHun ka dawa kiya

jaur ka shikwa na karun zulm hai

raaz mera sabr ne ifsha kiya

kuchh bhi ban aati nahin kya kijiye

us ke bigaDne ne kuchh aisa kiya

jae thi teri mere dil mein so hai

ghair se kyun shikwa-e-beja kiya

rahm falak aur mere haal par

tu ne karam ai sitam-ara kiya

sach hi sahi aap ka paiman wale

marg ne kab wada-e-farda kiya

dawa-e-taklif se jallad ne

roz-e-jaza qatl phir apna kiya

marg ne hijran mein chhupaya hai munh

lo munh usi parda-nashin ka kiya

dushman-e-'momin' hi rahe but sada

mujh se mere nam ne ye kya kiya