dida-e-tar ne ajab jalwagari dekhi hai

dīda-e-tar ne ajab jalvagarī dekhī hai

ġham ne jis shāḳh ko paalā vo harī dekhī hai

haa.e kis but kī ḳhudā.ī kā bharam TuuTā hai

ḳhalq ne aaj in āñkhoñ meñ tarī dekhī hai

na milā par na milā ishq ko andāz-e-junūñ

ham ne majnūñ kī bhī āshufta-sarī dekhī hai

āb-o-gil ġhuncha-o-gul dīda-o-dil shams-o-qamar

kin hijāboñ meñ tirī parda-darī dekhī hai

haañ kabhī khul na sakā phuul pe mazmūn-e-bahār

o sabā ham ne tirī nāma-barī dekhī hai

kaun asīr-e-ġham-e-kotāhī-e-parvāz nahīñ

kis ne sayyād kī be-bāl-o-parī dekhī hai

dida-e-tar ne ajab jalwagari dekhi hai

gham ne jis shaKH ko pala wo hari dekhi hai

hae kis but ki KHudai ka bharam TuTa hai

KHalq ne aaj in aankhon mein tari dekhi hai

na mila par na mila ishq ko andaz-e-junun

hum ne majnun ki bhi aashufta-sari dekhi hai

aab-o-gil ghuncha-o-gul dida-o-dil shams-o-qamar

kin hijabon mein teri parda-dari dekhi hai

han kabhi khul na saka phul pe mazmun-e-bahaar

o saba hum ne teri nama-bari dekhi hai

kaun asir-e-gham-e-kotahi-e-parwaz nahin

kis ne sayyaad ki be-baal-o-pari dekhi hai