didani hai bahaar ka manzar

dīdanī hai bahār kā manzar

zahr chhiḌkā gayā daraḳhtoñ par

bun rahe haiñ urūs-e-gul kā kafan

magas-e-barg o ankabūt-e-shajar

chiil kavvoñ ko tākte rahiye

chāñd tāroñ se thak ga.ī hai nazar

jo mirā takiya-e-javānī thā

usī bargad kī jhuk ga.ī hai kamar

haath phailā ke chīḳhte haiñ daraḳht

sarsar-e-hādisa kā ruḳh hai kidhar

surḳh phūloñ ke laal añgāre

chashm-e-zard-e-uqāb ke aḳhgar

vo jabīn-e-shafaq pe ḳhatt-e-shuā

ḳhuun se kis ke surḳh hai ḳhanjar

ab ke barsāt kuchh to raas aa.ī

ghaas ugne lagī muñDeroñ par

dhuup is sahn meñ na dar aa.e

band kar do tamām rauzan-e-dar

raqs karte hue bagūloñ meñ

dev o jinnāt o ruuh ke lashkar

dekhtā huuñ ki kyā dikhāte haiñ

apne saa.e pe jam ga.ī hai nazar

ālam-e-be-ḳhudī meñ gahrā saañs

sīna-e-kā.enāt meñ hai safar

aap apne se kyuuñ gurezāñ huuñ

kisī aaseb kā hai mujh pe asar

kaun mere liye hai shab-bedār

kyuuñ baraste haiñ raat bhar patthar

maiñ hī maiñ huuñ ḳhalā-e-tīra meñ

na atārid na mushtarī na qamar

tah-ba-tah zulmateñ haiñ jumbish meñ

reñgte haiñ siyāh-posh azhdar

jabalushshams kī bulandī se

dekhtā huuñ zamīñ ko jhuk jhuk kar

ek pur-nūr nīlgūñ nuqta

kāñptā hai ḳhalā meñ rah rah kar

kahkashāñ se shumāl kī jānib

vaqt ke be-nishān mehvar par

nuur ke dā.ere haiñ gardish meñ

āḳhir in qāfiloñ kā ruḳh hai kidhar

kaun āḳhir jhiñjhoḌtā hai mujhe

ālam-e-ḳhvāb meñ sar-e-bistar

kaun āḳhir mujhe jagātā hai

āḳhir shab meñ roz aa aa kar

na shahāba na koī tayyāra

kaun uḌ kar gayā idhar se udhar

didani hai bahaar ka manzar

zahr chhiDka gaya daraKHton par

bun rahe hain urus-e-gul ka kafan

magas-e-barg o ankabut-e-shajar

chil kawwon ko takte rahiye

chand taron se thak gai hai nazar

jo mera takiya-e-jawani tha

usi bargad ki jhuk gai hai kamar

hath phaila ke chiKHte hain daraKHt

sarsar-e-hadisa ka ruKH hai kidhar

surKH phulon ke lal angare

chashm-e-zard-e-uqab ke aKHgar

wo jabin-e-shafaq pe KHatt-e-shua

KHun se kis ke surKH hai KHanjar

ab ke barsat kuchh to ras aai

ghas ugne lagi munDeron par

dhup is sahn mein na dar aae

band kar do tamam rauzan-e-dar

raqs karte hue bagulon mein

dew o jinnat o ruh ke lashkar

dekhta hun ki kya dikhate hain

apne sae pe jam gai hai nazar

aalam-e-be-KHudi mein gahra sans

sina-e-kaenat mein hai safar

aap apne se kyun gurezan hun

kisi aaseb ka hai mujh pe asar

kaun mere liye hai shab-bedar

kyun baraste hain raat bhar patthar

main hi main hun KHala-e-tira mein

na atarid na mushtari na qamar

tah-ba-tah zulmaten hain jumbish mein

rengte hain siyah-posh azhdar

jabalushshams ki bulandi se

dekhta hun zamin ko jhuk jhuk kar

ek pur-nur nilgun nuqta

kanpta hai KHala mein rah rah kar

kahkashan se shumal ki jaanib

waqt ke be-nishan mehwar par

nur ke daere hain gardish mein

aaKHir in qafilon ka ruKH hai kidhar

kaun aaKHir jhinjhoDta hai mujhe

aalam-e-KHwab mein sar-e-bistar

kaun aaKHir mujhe jagata hai

aaKHir shab mein roz aa aa kar

na shahaba na koi tayyara

kaun uD kar gaya idhar se udhar