دیوانگی کا اپنے سر الزام لیا ہے

دیوانگی کا اپنے سر الزام لیا ہے

جب تجھ کو بھلایا ہے ترا نام لیا ہے

جب بھی ہے لگی راہ خرد میں کوئی ٹھوکر

گھبرا کے وہیں دست جنوں تھام لیا ہے

عیسیٰ تو نہیں میں پہ سر عشق و جنوں پر

ناکردہ گناہوں کا بھی الزام لیا ہے

مجبور مروت نے ہر احسان کے بدلے

یاروں سے فقط تحفۂ دشنام لیا ہے

دیکھو نہ حقارت سے مرے دل کی تھکن کو

اس دل سے زمانے نے بڑا کام لیا ہے

ایسا بھی ہوا ہے کہ بھری بزم میں سالکؔ

ان آنکھوں نے ان آنکھوں سے پیغام لیا ہے