diwanon mein zikr-e-dil-e-diwana rahega

dīvānoñ meñ zikr-e-dil-e-dīvāna rahegā

jab maiñ na rahūñgā mirā afsāna rahegā

gesū kī bhī nig.hat se vo begāna rahegā

dīvāna tirī zulf kā dīvāna rahegā

majnūñ ne kahā najd meñ mujh se dam-e-āḳhir

ābād tire dam se ye vīrāna rahegā

hāthoñ meñ vo mehñdī bhī maleñ dil kā lahū bhī

donoñ kā magar rañg judāgāna rahegā

ka.abe kī taraf jaane ko ham jā.eñge zāhid

dil mahv-e-ḳhyāl-e-rah-e-but-ḳhāna rahegā

ārām milegā na zamāne meñ 'jigar' ko

dil meñ jo na tū ai ġham-e-jānāna rahegā

diwanon mein zikr-e-dil-e-diwana rahega

jab main na rahunga mera afsana rahega

gesu ki bhi nighat se wo begana rahega

diwana teri zulf ka diwana rahega

majnun ne kaha najd mein mujh se dam-e-aKHir

aabaad tere dam se ye virana rahega

hathon mein wo mehndi bhi malen dil ka lahu bhi

donon ka magar rang judagana rahega

kabe ki taraf jaane ko hum jaenge zahid

dil mahw-e-KHyal-e-rah-e-but-KHana rahega

aaram milega na zamane mein 'jigar' ko

dil mein jo na tu ai gham-e-jaanana rahega