diwar ban gae the jo mausam badal gae

dīvār ban ga.e the jo mausam badal ga.e

aa jā.iye ki shaam ke saa.e bhī Dhal ga.e

ātish-fishāñ pahāḌ the laave nigal ga.e

shātir-mizāj log na.ī chaal chal ga.e

hālāñki baat sach hī kahī thī zamīr ne

lekin bahut hī talḳh the alfāz khal ga.e

sub.h-e-shab-e-siyāh baḌe tumtarāq se

sūraj ugā rahī thī magar haath jal ga.e

aa.ī shab-e-siyāh ziyā-bāriyoñ ke saath

shukr-e-ḳhudā ki apne bure din bhī Tal ga.e

jaise kisī kā sūr-e-sarāfīl phūñknā

duniyā-e-dard kaañp uThī dil dahal ga.e

is darja pā.edār safīna thā azm kā

tūfān aa.e aur irāde badal ga.e

dekhā mazāq uḌāne lagīñ phir bulandiyāñ

ham phir 'ufuq' hudūd se aage nikal ga.e

diwar ban gae the jo mausam badal gae

aa jaiye ki sham ke sae bhi Dhal gae

aatish-fishan pahaD the lawe nigal gae

shatir-mizaj log nai chaal chal gae

haalanki baat sach hi kahi thi zamir ne

lekin bahut hi talKH the alfaz khal gae

subh-e-shab-e-siyah baDe tumtaraq se

suraj uga rahi thi magar hath jal gae

aai shab-e-siyah ziya-bariyon ke sath

shukr-e-KHuda ki apne bure din bhi Tal gae

jaise kisi ka sur-e-sarafil phunkna

duniya-e-dard kanp uThi dil dahal gae

is darja paedar safina tha azm ka

tufan aae aur irade badal gae

dekha mazaq uDane lagin phir bulandiyan

hum phir 'ufuq' hudud se aage nikal gae