diwar-e-takalluf hai to mismar karo na

dīvār-e-takalluf hai to mismār karo nā

gar us se mohabbat hai to iz.hār karo nā

mumkin hai tumhāre liye ho jā.ūñ maiñ āsāñ

tum ḳhud ko mire vāste dushvār karo nā

gar yaad karoge to chalā ā.ūñgā ik din

tum dil kī guzargāh ko hamvār karo nā

bāhar ke mahāzoñ kī tumheñ fat.h mubārak

ab nafs ke shaitāñ ko giraftār karo nā

kahnā hai agar kuchh to pas-o-pesh karo mat

khul ke kabhī jazbāt kā iz.hār karo nā

har rishta-e-jāñ toḌ ke aayā huuñ yahāñ tak

tum bhī mirī ḳhātir koī īsār karo nā

'aijāz' tumhāre liye sāhil pe khaḌā huuñ

dariyā-e-vafā mere liye paar karo nā

diwar-e-takalluf hai to mismar karo na

gar us se mohabbat hai to izhaar karo na

mumkin hai tumhaare liye ho jaun main aasan

tum KHud ko mere waste dushwar karo na

gar yaad karoge to chala aaunga ek din

tum dil ki guzargah ko hamwar karo na

bahar ke mahazon ki tumhein fath mubarak

ab nafs ke shaitan ko giraftar karo na

kahna hai agar kuchh to pas-o-pesh karo mat

khul ke kabhi jazbaat ka izhaar karo na

har rishta-e-jaan toD ke aaya hun yahan tak

tum bhi meri KHatir koi isar karo na

'aijaz' tumhaare liye sahil pe khaDa hun

dariya-e-wafa mere liye par karo na