dikha ai naKHun-e-gham lutf-e-baham aise saman par

dikhā ai nāḳhun-e-ġham lutf-e-bāham aise sāmāñ par

garebāñ kā ho muñh dāman pe dāman kā garebāñ par

vo so.e ho ke be-parda yahāñ kis kis tamannā se

magar sadqe havā ke raat bhar ro.e daraḳhshāñ par

tumhāre dast-e-nāzuk ne jo kiiñ aThkheliyāñ us se

utar aayā garebāñ muskurā kar pā-e-dāmāñ par

sikhāyā chashm ko kyā ātish-e-ġham ne dam-e-girya

har ik aañsū banā hai aabla dāmān-e-mizhgāñ par

jigar meñ kis maze se chuTkiyāñ letā hai chhup-chhup kar

gumān-e-shāhid-e-pahlū hai mujh ko dard-e-pinhāñ par

maiñ vo shaidā-e-gesū huuñ ki aksar mausam-e-gul meñ

mirā pā-e-nazar paḌtā hai zanjīr-e-gulistāñ par

vo bulbul huuñ ġhazal-ḳhvān ai 'shagufta' bāġh-e-ālam meñ

garāñ hotā nahīñ merā suḳhan tab-e-suḳhan-dāñ par

dikha ai naKHun-e-gham lutf-e-baham aise saman par

gareban ka ho munh daman pe daman ka gareban par

wo soe ho ke be-parda yahan kis kis tamanna se

magar sadqe hawa ke raat bhar roe daraKHshan par

tumhaare dast-e-nazuk ne jo kin aThkheliyan us se

utar aaya gareban muskura kar pa-e-daman par

sikhaya chashm ko kya aatish-e-gham ne dam-e-girya

har ek aansu bana hai aabla daman-e-mizhgan par

jigar mein kis maze se chuTkiyan leta hai chhup-chhup kar

guman-e-shahid-e-pahlu hai mujh ko dard-e-pinhan par

main wo shaida-e-gesu hun ki aksar mausam-e-gul mein

mera pa-e-nazar paDta hai zanjir-e-gulistan par

wo bulbul hun ghazal-KHwan ai 'shagufta' bagh-e-alam mein

garan hota nahin mera suKHan tab-e-suKHan-dan par