dikhai denge jo gul mez par qarine se

dikhā.ī deñge jo gul mez par qarīne se

havā.eñ chheḌeñgī aa kar khule darīche se

ḳhalā meñ aaj sakūñ apnā DhūñDhtā hai vahī

bahal gayā thā jo bachcha kabhī khilaune se

tumhāre dil meñ hai ik karb sā kisī ke liye

ye baat ham ne paḌhī hai tumhāre chehre se

jale jo dil to yaqīnan laboñ pe hogī karāh

dhuāñ to phailegā jangal meñ aag lagne se

fazā meñ sūrat-e-shāhīñ buland ho kar dekh

dikhā.ī deñge ye ūñche daraḳht chhoTe se

sunā.ī dī hai kahīñ kyā ḳhizāñ ke pānoñ kī chaap

ki phuul aaj haiñ gulshan meñ sahme sahme se

chalo ki pūchheñ kisī soḳhta-jigar se ye baat

gurez hotā hai kab aadmī ko jiine se

vafā na TūTne vaalī hai ek shai 'shāriq'

karo vafā ko na tā'bīr kachche dhāge se

dikhai denge jo gul mez par qarine se

hawaen chheDengi aa kar khule dariche se

KHala mein aaj sakun apna DhunDhta hai wahi

bahal gaya tha jo bachcha kabhi khilaune se

tumhaare dil mein hai ek karb sa kisi ke liye

ye baat hum ne paDhi hai tumhaare chehre se

jale jo dil to yaqinan labon pe hogi karah

dhuan to phailega jangal mein aag lagne se

faza mein surat-e-shahin buland ho kar dekh

dikhai denge ye unche daraKHt chhoTe se

sunai di hai kahin kya KHizan ke panon ki chap

ki phul aaj hain gulshan mein sahme sahme se

chalo ki puchhen kisi soKHta-jigar se ye baat

gurez hota hai kab aadmi ko jine se

wafa na TuTne wali hai ek shai 'shaariq'

karo wafa ko na ta'bir kachche dhage se