دکھانے راستہ مجھ کو چلا ہے

دکھانے راستہ مجھ کو چلا ہے

جو خود ہی راہ سے بھٹکا ہوا ہے

خوشی کو ڈھونڈنے جب بھی چلا ہوں

دکھوں کا اک گھنا جنگل ملا ہے

تباہی کا کسے دوں دوش اپنی

مرا دشمن مرے اندر چھپا ہے

کہیں تو کھو نہ دے اپنا نشاں بھی

جہاں کی بھیڑ میں کیوں کھو گیا ہے

مکانوں میں مکیں سہمے ہوئے ہیں

افق سے پھر اٹھی کالی گھٹا ہے

ہمارا حق بھی ہے اس روشنی پر

چراغوں کو لہو ہم نے دیا ہے

نوازش بھی رہی ہے اس کی ہاتفؔ

ستم بھی وہ کرے تو اب روا ہے