dil-azari mohabbat mein kahan malum hoti hai

dil-āzārī mohabbat meñ kahāñ ma.alūm hotī hai

ajab taskīñ pas-e-soz-e-nihāñ ma.alūm hotī hai

nigāh-e-nāz aksar dāstāñ ma.alūm hotī hai

kisī kī aañkh ham-vasf-e-zabāñ ma.alūm hotī hai

ḳhudāyā ḳhair kyā taaza tabāhī aane vaalī hai

ḳhamoshī se qarīb-e-āshiyāñ ma.alūm hotī hai

chhupī jaatī hai manzil hī ġhubār-e-rāh-e-manzil meñ

mirī qismat sharīk-e-kārvāñ ma.alūm hotī hai

ye garm-e-guftugū sayyād kis se hai zarā sun lo

qafas vaalo sadā-e-bāġhbāñ ma.alūm hotī hai

mirī bāteñ to vo shikva samajh kar sun nahīñ sakte

ḳhamoshī bhī unheñ merī garāñ ma.alūm hotī hai

fareb-e-shauq meñ manzil jinheñ āñkheñ samajhtī thiiñ

vahī ab āh-e-gard-e-kārvāñ ma.alūm hotī hai

ġhurūr-e-husn se koshish matānat iḳhtiyārī kī

tumhārī shoḳhiyoñ meñ rā.egāñ ma.alūm hotī hai

zamāne kī zabāñ par hai unhīñ kī dāstāñ 'tālib'

unheñ har baat merī dāstāñ ma.alūm hotī hai

dil-azari mohabbat mein kahan malum hoti hai

ajab taskin pas-e-soz-e-nihan malum hoti hai

nigah-e-naz aksar dastan malum hoti hai

kisi ki aankh ham-wasf-e-zaban malum hoti hai

KHudaya KHair kya taza tabahi aane wali hai

KHamoshi se qarib-e-ashiyan malum hoti hai

chhupi jati hai manzil hi ghubar-e-rah-e-manzil mein

meri qismat sharik-e-karwan malum hoti hai

ye garm-e-guftugu sayyaad kis se hai zara sun lo

qafas walo sada-e-baghban malum hoti hai

meri baaten to wo shikwa samajh kar sun nahin sakte

KHamoshi bhi unhen meri garan malum hoti hai

fareb-e-shauq mein manzil jinhen aankhen samajhti thin

wahi ab aah-e-gard-e-karwan malum hoti hai

ghurur-e-husn se koshish matanat iKHtiyari ki

tumhaari shoKHiyon mein raegan malum hoti hai

zamane ki zaban par hai unhin ki dastan 'talib'

unhen har baat meri dastan malum hoti hai