dil agar kuchh mang lene ki ijazat mangta

dil agar kuchh maañg lene kī ijāzat māñgtā

ye mohabbat-zād tajdīd-e-mohabbat māñgtā

vaqt ḳhud nā-pā.edārī ke liye mash.hūr hai

aise be-taufīq se maiñ ḳhaak shohrat māñgtā

maiñ ne sahrā se tahayyur-ḳhez hairat maañg lī

ḳhaak ho jaatā agar tahzīb-e-vahshat māñgtā

dil ko ḳhush aa.ī nahīñ ye daulat-e-āsūdgī

aur kuchh mil jaatī to ye kuchh aur zahmat māñgtā

haiñ ḳhudāvandān-e-duniyā ham tahī-dastoñ se hech

dil ko hasrat thī to ham jaisoñ se ḳhil.at māñgtā

ho gayā hotā girāñ-goshoñ se gar maġhlūb maiñ

kyuuñ suḳhan āġhāz kartā kyuuñ samā.at māñgtā

kyā ta.ajjub thā ki is saudā-garī ke daur meñ

ḳhvāb bhī ta.abīr ho jaane kī qīmat māñgtā

dil agar kuchh mang lene ki ijazat mangta

ye mohabbat-zad tajdid-e-mohabbat mangta

waqt KHud na-paedari ke liye mashhur hai

aise be-taufiq se main KHak shohrat mangta

main ne sahra se tahayyur-KHez hairat mang li

KHak ho jata agar tahzib-e-wahshat mangta

dil ko KHush aai nahin ye daulat-e-asudgi

aur kuchh mil jati to ye kuchh aur zahmat mangta

hain KHudawandan-e-duniya hum tahi-daston se hech

dil ko hasrat thi to hum jaison se KHilat mangta

ho gaya hota giran-goshon se gar maghlub main

kyun suKHan aaghaz karta kyun samaat mangta

kya tajjub tha ki is sauda-gari ke daur mein

KHwab bhi tabir ho jaane ki qimat mangta