dil agar shaista-e-dard-e-nihan paida karen

dil agar shā.ista-e-dard-e-nihāñ paidā kareñ

har ġham-e-jāñ-kāh se ārām-e-jāñ paidā kareñ

kufr-o-dīñ meñ ittihād-e-jāvedāñ paidā kareñ

nālā-e-nāqūs se bāñg-e-azāñ paidā kareñ

imtiyāz-e-īn-o-āñ se īn-o-āñ donoñ tabāh

ab na hargiz imtiyāz-e-īn-o-āñ paidā kareñ

ek ham haiñ apne gulshan ko jo sahrā kar chuke

ek vo haiñ dasht meñ jo gulsitāñ paidā kareñ

ādamiyyat ko na chhoḌeñ ham ġhanīmat hai yahī

kaun kahtā hai sifāt-e-qudsiyāñ paidā kareñ

jo muhibbān-e-vatan shān-e-vatan par mar miTe

ḳhaak se un kī nayā hindostāñ paidā kareñ

duur duniyā se kahīñ ai tab-e-mazmūñ-āfrīñ

ik ḳhayālī ālam-e-amn-o-amāñ paidā kareñ

nukta-chīnī se na baaz ā.eñge hargiz nukta-chīñ

laakh ai 'mahrūm' ham husn-e-bayāñ paidā kareñ

dil agar shaista-e-dard-e-nihan paida karen

har gham-e-jaan-kah se aaram-e-jaan paida karen

kufr-o-din mein ittihad-e-jawedan paida karen

nala-e-naqus se bang-e-azan paida karen

imtiyaz-e-in-o-an se in-o-an donon tabah

ab na hargiz imtiyaz-e-in-o-an paida karen

ek hum hain apne gulshan ko jo sahra kar chuke

ek wo hain dasht mein jo gulsitan paida karen

aadamiyyat ko na chhoDen hum ghanimat hai yahi

kaun kahta hai sifat-e-qudsiyan paida karen

jo muhibban-e-watan shan-e-watan par mar miTe

KHak se un ki naya hindostan paida karen

dur duniya se kahin ai tab-e-mazmun-afrin

ek KHayali aalam-e-amn-o-aman paida karen

nukta-chini se na baz aaenge hargiz nukta-chin

lakh ai 'mahrum' hum husn-e-bayan paida karen