dil ajab jalwa-e-ummid dikhata hai mujhe

dil ajab jalva-e-ummīd dikhātā hai mujhe

shaam se 'yās' saverā nazar aatā hai mujhe

jalva-e-dār-o-rasan apne nasīboñ meñ kahāñ

kaun duniyā kī nigāhoñ pe chaḌhātā hai mujhe

dil ko lahrātā hai hañgāma-e-znidān-e-balā

shor-e-īzā-talabī vajd meñ laatā hai mujhe

pā-e-āzād hai zindāñ ke chalan se bāhar

beḌiyāñ kyuuñ koī dīvāna pahnātā hai mujhe

hañs ke kahtā hai ki ghar apnā qafas ko samjho

sabaq ulTā mirā sayyād paḌhātā hai mujhe

jaise dozaḳh kī havā khā ke abhī aayā hai

kis qadar vā.iz-e-makkār Darātā hai mujhe

phaT paḌeñ ab hī dar-o-bām to parda rah jaa.e

falak-e-ḳhāna-ḳharāb aañkh dikhātā hai mujhe

dīdanī hai chaman-ārā.ī-e-chashm-e-ibrat

sair-e-tāza gul-e-pazhmurda dikhātā hai mujhe

tark-e-matlab se hai matlab to duā.eñ kaisī

sub.h tak kyuuñ dil-e-bīmār jagātā hai mujhe

nañg-e-mahfil mirā zinda mirā murda bhārī

kaun uThātā hai mujhe kaun biThātā hai mujhe

lab-e-dariyā kā huā maiñ na tah-e-dariyā kā

kaun se ghaaT ye dhārā liye jaatā hai mujhe

paañv so.e haiñ magar jāgte haiñ apne nasīb

kyā samajh kar jaras-e-guñg jagātā hai mujhe

'yās' manzil hai mirī manzil-e-anqā-e-kamāl

lucknow meñ koī kyuuñ DhūñDne aatā hai mujhe

dil ajab jalwa-e-ummid dikhata hai mujhe

sham se 'yas' sawera nazar aata hai mujhe

jalwa-e-dar-o-rasan apne nasibon mein kahan

kaun duniya ki nigahon pe chaDhata hai mujhe

dil ko lahraata hai hangama-e-znidan-e-bala

shor-e-iza-talabi wajd mein lata hai mujhe

pa-e-azad hai zindan ke chalan se bahar

beDiyan kyun koi diwana pahnata hai mujhe

hans ke kahta hai ki ghar apna qafas ko samjho

sabaq ulTa mera sayyaad paDhata hai mujhe

jaise dozaKH ki hawa kha ke abhi aaya hai

kis qadar waiz-e-makkar Daraata hai mujhe

phaT paDen ab hi dar-o-baam to parda rah jae

falak-e-KHana-KHarab aankh dikhata hai mujhe

didani hai chaman-arai-e-chashm-e-ibrat

sair-e-taza gul-e-pazhmurda dikhata hai mujhe

tark-e-matlab se hai matlab to duaen kaisi

subh tak kyun dil-e-bimar jagata hai mujhe

nang-e-mahfil mera zinda mera murda bhaari

kaun uThata hai mujhe kaun biThata hai mujhe

lab-e-dariya ka hua main na tah-e-dariya ka

kaun se ghaT ye dhaara liye jata hai mujhe

panw soe hain magar jagte hain apne nasib

kya samajh kar jaras-e-gung jagata hai mujhe

'yas' manzil hai meri manzil-e-anqa-e-kamal

lucknow mein koi kyun DhunDne aata hai mujhe