dil apna jalaya hai kisi ne bhi KHushi se

dil apnā jalāyā hai kisī ne bhī ḳhushī se

ban jaatī hai jī par to guzar jaate haiñ jī se

jhūToñ kabhī pūchhā hai to vahm aa.e haiñ kyā kyā

mānūs haiñ itne tirī begāna-ravī se

rasta jise mil jaa.e ye taufīq hai us kī

palTā nahīñ ab tak hai koī terī galī se

ḳhushbū ne bahārāñ kī sunī chaap kisī ne

māyūs na honā mirī āhista-ravī se

ban ban ke bigaḌte rahe ummīd ke paikar

aazar the magar kaam rahā but-shikanī se

andesha bas itnā hī rahā dasht-e-talab meñ

bhar aa.e kahīñ aañkh 'adā' tishna-labī se

dil apna jalaya hai kisi ne bhi KHushi se

ban jati hai ji par to guzar jate hain ji se

jhuTon kabhi puchha hai to wahm aae hain kya kya

manus hain itne teri begana-rawi se

rasta jise mil jae ye taufiq hai us ki

palTa nahin ab tak hai koi teri gali se

KHushbu ne bahaaran ki suni chap kisi ne

mayus na hona meri aahista-rawi se

ban ban ke bigaDte rahe ummid ke paikar

aazar the magar kaam raha but-shikani se

andesha bas itna hi raha dasht-e-talab mein

bhar aae kahin aankh 'ada' tishna-labi se