dil bache kyunkar buton ki chashm-e-shoKH-o-shang se

dil bache kyūñkar butoñ kī chashm-e-shoḳh-o-shañg se

apnā ghar to sūjhtā hai saikḌoñ farsañg se

ek bhī nikle na merī sī fuġhān-e-dil-ḳharāsh

garche ḳhuuñ Tapke gulū-e-murġh-e-ḳhush-āhañg se

chhup ke baiThegā kahāñ tū ham se ai rañgīñ-navā

hogā tū jis rañg meñ mil jā.eñge us rañg se

bal be-bārīkī ki goyā har tirā tār-e-suḳhan

jantarī meñ khiñch ke niklā hai dahān-e-tañg se

ai taġhāful-kesh jaldī aa ki tū vāqif nahīñ

is dil-e-betāb o jān-e-muztarib ke Dhañg se

josh-e-girya se rahī barsāt barsoñ par kabhī

us kī teġh-e-tez ālūda na dekhī zañg se

mere girye ke asar se ho ga.e patthar bhī aab

jhaḌte haiñ jā-e-sharar paanī ke qatre sañg se

pahle ye nīyat vazū kī hai namāz-e-ishq meñ

dil se kah diije ki dhove haath naam o nañg se

'zauq' zebā hai jo ho rīsh-e-safed-e-shaiḳh par

vasma āb-e-bañg se mehñdī mai-e-gul-rañg se

dil bache kyunkar buton ki chashm-e-shoKH-o-shang se

apna ghar to sujhta hai saikDon farsang se

ek bhi nikle na meri si fughan-e-dil-KHarash

garche KHun Tapke gulu-e-murgh-e-KHush-ahang se

chhup ke baiThega kahan tu hum se ai rangin-nawa

hoga tu jis rang mein mil jaenge us rang se

bal be-bariki ki goya har tera tar-e-suKHan

jantari mein khinch ke nikla hai dahan-e-tang se

ai taghaful-kesh jaldi aa ki tu waqif nahin

is dil-e-betab o jaan-e-muztarib ke Dhang se

josh-e-girya se rahi barsat barson par kabhi

us ki tegh-e-tez aaluda na dekhi zang se

mere girye ke asar se ho gae patthar bhi aab

jhaDte hain ja-e-sharar pani ke qatre sang se

pahle ye niyat wazu ki hai namaz-e-ishq mein

dil se kah dije ki dhowe hath nam o nang se

'zauq' zeba hai jo ho rish-e-safed-e-shaiKH par

wasma aab-e-bang se mehndi mai-e-gul-rang se