dil baham pahuncha badan mein tab se sara tan jala

dil baham pahuñchā badan meñ tab se saarā tan jalā

aa paḌī ye aisī chingārī ki pairāhan jalā

sarkashī hī hai jo dikhlātī hai is majlis meñ daaġh

ho sake to sham.a saañ diije rag-e-gardan jalā

badr saañ ab āḳhir āḳhir chhā ga.ī mujh par ye aag

varna pahle thā mirā juuñ maah nau dāman jalā

kab talak dhūnī lagā.e jogiyoñ kī sī rahūñ

baiThe baiThe dar pe tere to mirā aasan jalā

garmī us ātish ke par kaale se rakhe chashm tab

jab koī merī tarah se deve sab tan man jalā

ho jo minnat se to kyā vo shab nashīnī baaġh kī

kaaT apnī raat ko ḳhār-o-ḳhas-e-gulḳhan jalā

sūkhte hī āñsuoñ ke nuur āñkhoñ kā gayā

bujh hī jaate haiñ diye jis vaqt sab roġhan jalā

sho.ala afshānī nahīñ ye kuchh na.ī is aah se

duuñ lagī hai aisī aisī bhī ki saarā ban jalā

aag sī ik dil meñ sulge hai kabhū bhaḌkī to 'mīr'

degī merī haDDiyoñ kā Dher juuñ īñdhan jalā

dil baham pahuncha badan mein tab se sara tan jala

aa paDi ye aisi chingari ki pairahan jala

sarkashi hi hai jo dikhlati hai is majlis mein dagh

ho sake to shama san dije rag-e-gardan jala

badr san ab aaKHir aaKHir chha gai mujh par ye aag

warna pahle tha mera jun mah nau daman jala

kab talak dhuni lagae jogiyon ki si rahun

baiThe baiThe dar pe tere to mera aasan jala

garmi us aatish ke par kale se rakhe chashm tab

jab koi meri tarah se dewe sab tan man jala

ho jo minnat se to kya wo shab nashini bagh ki

kaT apni raat ko KHar-o-KHas-e-gulKHan jala

sukhte hi aansuon ke nur aankhon ka gaya

bujh hi jate hain diye jis waqt sab roghan jala

shoala afshani nahin ye kuchh nai is aah se

dun lagi hai aisi aisi bhi ki sara ban jala

aag si ek dil mein sulge hai kabhu bhaDki to 'mir'

degi meri haDDiyon ka Dher jun indhan jala