dil base the magar ujaD rahe the

dil base the magar ujaḌ rahe the

ham mohabbat kī jang laḌ rahe the

'ishq ke haath ban rahe the hamīñ

shak ke hāthoñ se ham udhaḌ rahe the

'ishq bhī un dinoñ ziyāda thā

jin dinoñ ham ziyāda laḌ rahe the

jism meñ us ke gul khile the jahāñ

ham vahīñ titliyāñ pakaḌ rahe the

baat aisī ki koī baat na thī

ham usī baat par jhagaḌ rahe the

ek hī din meñ sab nahīñ huā ḳhatm

ham ka.ī roz se bichhaḌ rahe the

jis ne barbād kar diyā ham ko

ham usī 'ishq par akaḌ rahe the

gaañv meñ bārishoñ kā mausam thā

aur ham machhliyāñ pakaḌ rahe the

terah chaudah baras kī 'umr thī vo

ham usī 'umr meñ bigaḌ rahe the

us kī marzī se chashma phuuT paḌā

ham to bas eḌiyāñ ragaḌ rahe the

qāfile kā nasīb hijrat thā

ḳheme ik baar phir ukhaḌ rahe the

dil base the magar ujaD rahe the

hum mohabbat ki jang laD rahe the

'ishq ke hath ban rahe the hamin

shak ke hathon se hum udhaD rahe the

'ishq bhi un dinon ziyaada tha

jin dinon hum ziyaada laD rahe the

jism mein us ke gul khile the jahan

hum wahin titliyan pakaD rahe the

baat aisi ki koi baat na thi

hum usi baat par jhagaD rahe the

ek hi din mein sab nahin hua KHatm

hum kai roz se bichhaD rahe the

jis ne barbaad kar diya hum ko

hum usi 'ishq par akaD rahe the

ganw mein barishon ka mausam tha

aur hum machhliyan pakaD rahe the

terah chaudah baras ki 'umr thi wo

hum usi 'umr mein bigaD rahe the

us ki marzi se chashma phuT paDa

hum to bas eDiyan ragaD rahe the

qafile ka nasib hijrat tha

KHeme ek bar phir ukhaD rahe the