dil bata aur kya hai hone ko

dil batā aur kyā hai hone ko

choT khaa.ī hai maiñ ne rone ko

be-navā ḳhvāb muntazir haiñ mire

raat baaqī kahāñ hai sone ko

sozan-e-shauq ko shab-e-hijrāñ

sirf aañsū mile pirone ko

apnī ḳhushiyoñ meñ dūsroñ ke ġham

hausla chāhiye samone ko

nahīñ ma.alūm intizām hai kyā

dāman-e-zīst ke bhigone ko

nik.hatoñ ke dayār meñ mujh ko

ātishīñ gul mile pirone ko

roz ummīd jaag jaatī hai

gum-shuda aarzū ke khone ko

kuchh to ahbāb kaam ā.eñge

kashti-e-shauq ke Dubone ko

fikr us ko ho jis ke paas ho kuchh

kuchh nahīñ mere paas khone ko

maiñ huuñ tanhā.ī kā samundar hai

ġham khaḌe haiñ mujhe Dubone ko

āgahī sirf kaam aa.ī 'razā'

mere dāġh-e-junūñ ke dhone ko

dil bata aur kya hai hone ko

choT khai hai main ne rone ko

be-nawa KHwab muntazir hain mere

raat baqi kahan hai sone ko

sozan-e-shauq ko shab-e-hijran

sirf aansu mile pirone ko

apni KHushiyon mein dusron ke gham

hausla chahiye samone ko

nahin malum intizam hai kya

daman-e-zist ke bhigone ko

nikhaton ke dayar mein mujh ko

aatishin gul mile pirone ko

roz ummid jag jati hai

gum-shuda aarzu ke khone ko

kuchh to ahbab kaam aaenge

kashti-e-shauq ke Dubone ko

fikr us ko ho jis ke pas ho kuchh

kuchh nahin mere pas khone ko

main hun tanhai ka samundar hai

gham khaDe hain mujhe Dubone ko

aagahi sirf kaam aai 'raza'

mere dagh-e-junun ke dhone ko